Ke ou nan lakou lekòl ou nan rekreyasyon, ke ou nan yon peyi etranje, se menm kesyon sa tout moun poze ou: “moun ki bò ou ye.” Lè mwen te elèv nan lekòl primè se yon kesyon ki toujou etone m’ lè kamarad mwen mande m’ li. Se yon kesyon ki konn menm fè m’ fache paske mwen pa soti lwen. Mwen lekòl kafou e se la mwen grandi. Men depi ou di se moun bò isit ou ye, yo mande ou ki kote manman ou ak papa ou soti. Men ni manman m’ ak papa m’ pa soti lwen non plis. Manman m’ fèt Pòtoprens. Papa m’ fèt Gantye, se yon zòn nan Depatman Lwès la, pa lwen Kwadèboukè. Kamarad mwen yo gen paran yo ki soti Jakmel, Benè, Pòdepè, e lòt vil an pwovens. Se nan vil pwovens sa yo ke zanmi m’ yo konn al fè vakans lè lekòl fèmen.
An 1999, mwen ale viv a letranje nan vil Nouyòk, nan peyi Etazini. Lè ou Nouyòk ou rankontre moun ki soti nan anpil peyi tankou Lachin, Jamayik, Larisi, Dominikani e latriye. Preske nou tout nasyon sa yo ki vini rankontre nan peyi blan meriken toujou ap mande youn lòt: “moun ki bò ou ye,” sa vle di “nan ki peyi ou sòti.” Se yon kesyon inivèsèl ki ede nou fè konesans ak lòt moun epi pataje eksperyans nou, kizin ak kilti peyi nou, e latriye.
Si ou vizite paj la e ou li atik sa, pran yon ti moman pou di nou moun ki bò ou ye e ki kote ou ap viv kounye a. Mèsi.
Si vous êtes un nouveau visiteur de ce site, partagez votre ville de résidence ou ville de naissance çi-dessous. Merci.
If you are a new visitor of this website, feel free to share your current location or hometown in the comments section. Thanks.